„Политико“: Европската унија подготвува патокази за Црна Гора, Украина, Молдавија и Албанија Европската унија подготвува посебни патокази за Црна Гора, Украина, Молдавија и Албанија, со кои на овие четири земји би им се обезбедиле појасни рокови и услови за напредок кон членство, објави бриселскиот портал „Политико“, повикувајќи се на двајца високи претставници на Европската комисија. Според нивните изјави, патоказите треба да го забрзаат повеќедеценискиот процес на проширување и попрецизно да ги дефинираат реформите што треба да ги спроведе секоја од четирите земји, како и приближните рокови за завршување на преговарачките поглавја, односно кластери. Претставниците наведоа дека плановите би претставувале еден вид гаранција оти земјите ќе бидат примени во ЕУ доколку ги спроведат клучните реформи, при што би биле утврдени и индикативни рокови за завршување на преговорите.